अन्नमय्य कीर्तन देव देवं भजे
रागं: धन्नासि
देव देवं भजे दिव्यप्रभावम् ।
रावणासुरवैरि रणपुङ्गवम् ॥
राजवरशेखरं रविकुलसुधाकरं
आजानुबाहु नीलाभ्रकायम् ।
राजारि कोदण्ड राज दीक्षागुरुं
राजीवलोचनं रामचन्द्रम् ॥
नीलजीमूत सन्निभशरीरं घनवि-
शालवक्षं विमल जलजनाभम् ।
तालाहिनगहरं धर्मसंस्थापनं
भूललनाधिपं भोगिशयनम् ॥
पङ्कजासनविनुत परमनारायणं
शङ्करार्जित जनक चापदलनम् ।
लङ्का विशोषणं लालितविभीषणं
वेङ्कटेशं साधु विबुध विनुतम् ॥