ಅನ್ನಮಯ್ಯ ಕೀರ್ತನ ದೇವ ದೇವಂ ಭಜೇ
ರಾಗಂ: ಧನ್ನಾಸಿ
ದೇವ ದೇವಂ ಭಜೇ ದಿವ್ಯಪ್ರಭಾವಮ್ |
ರಾವಣಾಸುರವೈರಿ ರಣಪುಂಗವಮ್ ||
ರಾಜವರಶೇಖರಂ ರವಿಕುಲಸುಧಾಕರಂ
ಆಜಾನುಬಾಹು ನೀಲಾಭ್ರಕಾಯಮ್ |
ರಾಜಾರಿ ಕೋದಂಡ ರಾಜ ದೀಕ್ಷಾಗುರುಂ
ರಾಜೀವಲೋಚನಂ ರಾಮಚಂದ್ರಮ್ ||
ನೀಲಜೀಮೂತ ಸನ್ನಿಭಶರೀರಂ ಘನವಿ-
ಶಾಲವಕ್ಷಂ ವಿಮಲ ಜಲಜನಾಭಮ್ |
ತಾಲಾಹಿನಗಹರಂ ಧರ್ಮಸಂಸ್ಥಾಪನಂ
ಭೂಲಲನಾಧಿಪಂ ಭೋಗಿಶಯನಮ್ ||
ಪಂಕಜಾಸನವಿನುತ ಪರಮನಾರಾಯಣಂ
ಶಂಕರಾರ್ಜಿತ ಜನಕ ಚಾಪದಳನಮ್ |
ಲಂಕಾ ವಿಶೋಷಣಂ ಲಾಲಿತವಿಭೀಷಣಂ
ವೆಂಕಟೇಶಂ ಸಾಧು ವಿಬುಧ ವಿನುತಮ್ ||